Юлларда куркынычсызлык-янгын сүндерүчеләрнең махсус контролендә
Янгын сүндерүчеләр өчен юл – ул маршрут кына түгел, ә хәрби бурычны уңышлы үтәүнең төп факторларының берсе. Чакыру урынына вакытында килеп җитү һәм техниканың төзеклеге турыдан-туры машина йөртүчеләрнең дисциплинасына, профессиональлегенә һәм янгын сүндерү автомобильләренең торышына бәйле. Нәкъ менә шуңа күрә янгынга каршы хезмәт бүлекчәләрендә юл хәрәкәте иминлеге мәсьәләләренә даими нигездә зур игътибар бирелә.
ЮХИДИ инспекторы белән очрашу
Татарстан Республикасы янгынга каршы хезмәтенең Саба отрядының Яңа Шашы авылын саклау буенча аерым постында дежур смена Татарстан Республикасы Әтнә районы ЮХИДИ башлыгы Ямалиев Айнур Илһам улы белән очрашты.
ЮХИДИ инспекторы хезмәткәрләргә райондагы юл-транспорт хәле турында мәгълүмат бирде, шулай ук юл хәрәкәте кагыйдәләрендәге актуаль үзгәрешләр белән таныштырды.
Онлайн-тестлаштыру
Юл хәрәкәте иминлеген тәэмин итүгә контрольне көчәйтү, юл-транспорт һәлакәтләренең килеп чыгу сәбәпләрен кисәтү, шулай ук һөнәри әзерлекне яхшырту һәм дисциплинаны ныгыту максатларында машина йөртүчеләр составы белән даими рәвештә юл хәрәкәте кагыйдәләре буенча дәресләр үткәрелә.
Мәсәлән, Саба отрядының Олы Нырсы авылын саклау буенча аерым постында янгын сүндерү машиналарын йөртүчеләрнең юл йөрү кагыйдәләрен белүләренә онлайн-тест үткәрү оештырылды. Шәхси состав, теоретик әзерлекнең югары дәрәҗәсен раслап, биремнәрне уңышлы үтәде.
Техник хезмәт күрсәтү
Саба отрядының Лесхоз бистәсен саклау буенча аерым пост хезмәткәрләре янгын сүндерү автомобильләренә планлы техник хезмәт күрсәттеләр.
Техникага даими һәм сыйфатлы техник хезмәт күрсәтү гадәттән тыш хәлләргә оператив җавап бирүнең мөһим шарты булып тора. Барлык системаларны вакытында диагностикалау һәм тикшерү янгын сүндерү машинасының теләсә кайсы вакытта чакыруга чыгарга һәм куелган бурычны үтәргә әзер булуына ышанырга мөмкинлек бирә.
Саба янгынга каршы отрядында юл хәрәкәте иминлеге буенча планлаштырылган барлык чаралар үтәлде. Шәхси состав яхшы белем күрсәтте, техника төзек хәлдә.